~CaSaNa LoVe Stories~

~CASANA Love Stories~

Sada Kenang Ati~ Pengerindu Maya Bepangan Nadai Endur Nyema~

Pengerindu Maya Bepangan Nadai Endur Nyema..
Dunya Mina Antara Tua ..
Asai ke Surga Di Empu Tua .
Nadai Utai Ngasuh Ati Meragai..
Maya Nuan Bisi Ngerimbai.

Dinga sada ati Ku Sulu..
Ukai Ka ngelengka ke Nuan Ambu..
Aku Ngarap ke siku lelaki ulih ngiring ngatur Pengidupku..
Aku Ngandar ke nuan ambai mai aku idup Sejalai ..
Ngelaban Penguji Enggau Pengeliat Ati...

Tang Nuan Ukai baka di sanggam ati aku Laja..
Nuan Telalu Lemi Bekira ..
Maya Ngaga Pemutus dalam Pengidup..
Semua Utai Nuan Bepanggai Ba Apai Indai..
Semua Jaku Nuan Betuan Ke bala Nuan...
Nya ke NgasuhAti Nuan Penuh Enggau Rachun
Pengerindu Tuchi Nyadi Besebun..
Mata Nuan Empeleman Nyadi Rabun

Nuan Nyu enda ngelala Penyayau Aku Agie..
Semua Utai dikereja aku salah di mata nuan..
Nadai nyelepak Ari Nuan Enda Ringat ke aku Sulu..
Penyalah Mesai Ampa Digaga Nuan baka mesai Dampa..

Ari Beganti Ari..
Bulan Beganti Taun...
Panjai Ari di Asai ke Begulai Enggau Nuan..
Ngapus ke siang datai ke Malam Penuh Enggau Macam Leman..
Cukup pengelelak Aku NYelepak ke Pengerindu Aku Ke Nuan..
Cukup Pedis Aku Enselit ke Penyayau ke Nuan...

Puas Aku bekira ambai...
Nadai Jalai Tua agie ulih begulai..
Ti asai tu kaul tua Nirika Meligai...
Nadai alah sepu agie api pengerindu..
Ti udah Lama padam nyadi abu...
Dipuput ka ribut muput ambis tekebu..

Sada Kenang Ati ~Kediri Aku Ngenang Pengidup Diri~

Ujan Memesik Berasai Sunyi Di Ati..
Bulan Tampak Bebendang Mupuk Padam Dilamun Mua Ari..
Basah Mua Nerutu Ke dagu..
Kumbai AKu Ai Ujan Nemunya
Ai mata Neritik Naya..

Kediri Aku Ngenang Pengidup Diri..
Nyada Dalam Ati Semua Pemerinsa Idup Udah Ditapi..

Nyu Ke Semua Utai Dalam Idup Aku Enda Benasib...
Baik Ti ba Pengelantang pengeraja Aku kurang..
Tang Ba cherita Pengerindu Mega Aku Timpang...

Puas Aku Nanya Ati Diri Empu..
Nama Kabuah Aku Diukum Bulih Pengidup Bakatu..

Semak Nuan Enda Sayau ke Aku,
Nama Kabuah Nuan Milih Aku Suba Sulu?

Enti Amai Nuan Benchi Ke Aku Ambai,
Nama Kabuah Nuan Datai
Megai Jari mai Aku idup sejalai?

Nama Ilap Nama Kurang Aku Di Mata Nuan..
Ajar Mih, Padah, Tunjuk Ke Aku Ngambi Ku Nemu..

Ukai Mina Semua Utai Aku Ulih Berubah Ketegal Nuan,
Tang Meri Nuan NYawa Pun Aku Enda Ngira..

Nadai Utai Berega Di Dunya Dipinta Aku..
Mina deka bergulai Lantang Enggau Nuan Siku

Sada Kenang Ati ~Nadai Sekali ka Nuan Ngasai Penyayauku?~

Aku Nemu Diri Sayau ke Nuan Sulu..
Nyengala Nyata Pengerindu Ku Mina Ke Nuan Siku..
Tang Bakani Chara Ku Madah Ke Nuan Ambai.
Tiap Kali Ku nyebut Selalu dikumbai Nuan Bergagai..

Temati kutu Ku Sulu..
Nie Meh Jalai Ku Nyada Semua Pengeran ke Nuan Ambu..
Naka mih Penyamai Ti Nuan sulu ..
Ulih berati kediri empu..
Caragaya Ku Bergulai Enggau Nuan Ngelamatu..

Nadai Sekali ka Nuan Ngasai Penyayauku?
Nadai Ulih Sanggam selam Nuan ka semua pengasihnya sulu?
Sayau Amai Nuan terlalu Buta Nenggau meda semua pengerindu ku..

Tauka nuan sulu sigi nemu tuju ati aku..
Tang Nuan ngaga diri enda nemu laban enggai ngelebu ati aku?
Enti Bakatu mih asai ati antara tua..

Salah aku laban kelalu andar ke pengerindu ari nuan ambai..
Pengeran penyayau aku salah endur melempai..
Terpanggai ba dan meragai tuai..
Sayau ke orang ti enggai..
Nyua ke jari mai berambai tang orang enggai megai..

Terima kasih ke semua kenang ti manis antara tua..
Nadai ati benchi taja aku enda ngempu nuan..
Ku terima semua pengasa enggau ati terbuka..
Nuan enggau aku ukai di atur petara bergulai sama.

Sada Ati~PEMENCHI ULIH Ngancur ke PENGERINDU?~

"Enti Nyawa Nemu padam Di Bai Seput"
Pecaya ke enda Kita, PENGERINDU Tuchi Idup BELAMA?

Kala ngasai ti orang dikesayau lenyau tauka pegi ,
Ninting Ari Nuan betati ke iya lebih agie ti maya sunyi,

Kadangkala Taun bergaNti taun senaya ia enda ulih dibuai,
Sigi amai sarak bungai nyerara semengat Kitai ke idup enggau ke parai,

Tang NAMA UTAI ULIH nyelara PENGERINDU ke iya?
Semengat Aku semengat Nuan, Tubuh Tua ulih diselara..
PENGERINDU enggau PENYAYAU dalam ATI Tua..
BAKANI Ka Nyelara?

Nya mih , PEMESAI RETI PENGERINDU TUCHI
Nadai ulih di sukat nuan PENALAM IA NANAM ba ati Nuan..
Nadai Ulih Sagam Nuan KEMAYA IA NGENTU SAYAU ...

PEMENCHI ULIH Ngancur ke PENGERINDU?
Amai kini? Anang saru sulu, kadangkala MULUT MADAH UDAH BENCHI, Tang ATI Enda nemu bersaup Enggau MULUT Ngemula..

ENTI NUAN PEDIS laban meda IA PEDIS..
PENGERINDU NUAN CUKUP TUCHI

EMPU MIH ATI ENGGAU PENGIDUP IA BERIMBAI ENGGAU NUAN..
BEJALAI SERIRING ENGAU IA NYENTUKKA NYAWA PADAM

Sada Ati~Lemi Pengidup ku nuan nadai nyadi pengering dalam pendiau ku sayau~

Sebulan nandan Tua Udah Beselara sulu
Panjai asai ari dititi aku ambu..
Nadai nuan ngerimbai aku ambai...
Asai ka nadai reti idup aku wai..

Enda nyangka ngemedis tuk udah dilengka..
LEMI Pengidup ku nuan nadai nyadi pengering dalam pendiau ku sayau..

Timpang pejalai ku nuan nadai ngiringku ambai..
Sempama burung patah sayap deka terebai di langit mikai..
Sempama bungai patah ditangkai.
Layu aku kesulai nadai nuan Ngerimbai..

Enti baka jari aku ulih nyapai..
Ingin asai ati ku ka megai nuan ambai.. naban ke nuan pulai..
Tang sayau aku enda tau megai kesulai di ambu indu bukai..

Tua bersulu udah cukup lama..
Tusah senang nuan enda kala ngelengka..
Kumbai ku nadai penanggol pengerindu tua dipadu asie..
Tang ku ilap dunya injau tu mayuh penguji..

Apai indai nuan enggai nerima aku ke menantu..
Laban aku dikumbai sida nadai pendiau anak patubalu..
Malu amai asai ati di gaga baka nadai empedu..

Sida ngukum pengerindu tua ketegal reta dunya..
Macham cara sida nyelara tua berpangan..
Ba mata aku sida milih menantu di ambu nyadi ke bini nuan..
Nyabak betelai aku ambai rajai ati aku dibuai sida enda belalai..

Minta ampun aku sulu..
Cukup mih utai ke udah nyadi..
Udah maya aku nyurut kediri..
Biar tua sarak nadai laya..
Asal benchi ukai sempadan antara tua..

Ketegal kelalu sayau aku ngelepas ke nuan ngagai iya..
Ngarapka seduai lantang begulai sama..
Sayau mih ke iya baka nuan kala sayau ke aku.
Aku anang nuan irau enda iboh nuan ngira..
Petara lebih nemu nempa siko lelaki nangkup pengerindu aku jemah ila...

Sada Ati~Pengerindu tua baka leka ujan, neritik ke tanah nyadi bah anyut di bai sungai~

Beselarara Aja mih sulu.. 
Nitih ke Pemutus ari nuan..

Munyi ko nuan ambai..
Anggap pengerindu tua baka leka ujan, neritik ke tanah nyadi bah anyut di bai sungai.

Tang sebedau nuan sulu.. ngelengka pegi jauh ari aku..

Aku minta kasih pulai ke mih semua pemeri diberi aku ke nuan ...
alu ambi mih semua utai beri nuan ke aku..

Pulai ke mih ngagai aku "ATI"aku...
Ngambi aku ulih ngena ia SAYAU ke orang bukai..

Pulai ke Mih "SEMPUT" aku..
Ngambi aku ulih IDUP enggau orang bukai.

Ambi Pulai "JAKU MANIS" ti di tanam dalam IDup aku..
Ngambi aku Ulih nerima Semaya orang bukai..

Ambi Pulai "KENANG ANTARA TUA" ambi nadai penanggol aku NGEMPUN KE PENGERINDU BARU..

ULIH ka sulu? Semua utai ditempa antara tua di Pulai ke baru?

ULIH ka semuanya dibuai dipadam dalam idup tua?

Ulihka aku sayau ke orang bukai enti ATI Aku di bai nuan?

Ulihka Aku rindu ke orang bukai laban danji manis manis nuan meruan dikenang aku belama..

BAKANI AKU DEKA NGELENGKA KE NUAN?!!!!

Taja tubuh tua enda ulih bergulai tang AKU NGEMPU NUAN..

Pajak Bula ke Jaku Nuan, Ngasa ke Aku Dulu Beduan.

~Ambu Semuanya Udah Luya, Nyadi ke Bekau Kenang aja~

~Sayau Pengerindu Tua Nadai Tanda, Semina Lekat ba Leka Sada~

Sada Ati~Kenang Dalam Ati~

Repa..
Cukup pgerepa jalai tua diempang reba, 
Rangkang melintang meruan ngipa,

Bangat enggai nyadi diperaka,
Nangi ke buta ngasuh tara,
Pengerindu tua tumbuh menawa,
ke kanan diuan baya,
ke kiba dikenduan naga..

Pedih..
Atiku pedih rajai di sipat pati putih,
Berdarah ngabi ke telih,
Ngundan nanah nyadi kurih,

Aku besampi minta tinchin ajih,
ulih aku nagih senang ka ngalih,
lantang ati aku deka nyilih

Palan pengerindu ti nadai dalih,
Pendai penyayau ti nadai org mintih..

Naka penyima atiku mawa,
Bangat dikeduan enda belala,
nadai alai mantaika sebana,
orang ndai datai ngelila,

leka sabak enda dipansa,
semua pemerinsa tapuk ba dada,
mina ngena sada mantaika semua.

~Sada Dalam Ati~

Sada Ati ~ Lelengau~

Nyerumba lemai
silau mata panas
asai ati lelengau
seilu-ilu merampau
dini nuan ambu
kini nuan sayau..

dani kenyap dini ari
asai ke nyata nuan bisi
duduk ngimbai di tisi
begulai bepegai jari
bekunsi ke asai ati
becherita pengidup diri
sayau nya semina mimpi

dini alai aku ngiga
kini tunga aku neresa
senaya nadai dipeda
ayas nadai mansa
kempang nuan ngeleka
enda tepadah ke nyawa
ninggal ke janji semaya tua

Sada Ati ~"Ngambi Aku Badu Bemimpi Ngempu Nuan"~

Sayau,
Cukup Penyayau Meh Aku Ke Nuan ..
Pengerindu Aku Nadai Adan
Nadai Takat rindu Ke Nuan Siku..

Tang Pandak Jaku Pandak Kira Aku Ambai..
Pengerindu Aku Salah Endur Sangkai..
Ngining Bungai Di Taman Anak Raja..
Enda Nemu Diri Mensia Papa Kedana..

Bertaun Taun Aku Nyimpan Keingin Ati..
Deka Musil Bungai Di Pagar Enggau Sangkar Besi..
Mai Tubuh Gundai Gegendai Deka Megai Bungai..
Bai Ati Kelalu Rindu Deka Ngempu...
Enda Nyeremin Tudah Diri
Baka pun Rumput tumbuh Ngerepak Bungai..

Puas Aku Bekira bakani chara..
Maya manding Ke pengidup Diri Enggau Nuan Dara..
Enka Tu aja Jalai Patut Aku Pilih..
Buai Semua Pengerindu KE Nuan Abis Lengis..

Ya, munyi ke Nyamai mih Aku Muai..
Munyi ke sempama Mulut Nyebut Ati Enda Nyaut..
Tubuh Engkebut melakangka Nuan ..
Tang ATI Meruan Bemata , Benyawa ke Nama Nuan Siku..

Enggau Ai mata Aku Pegi..
Ukai Aku Timpak Dalam Idup Nuan Asi..
Biar Mih Lelaki ke Sengkeman Enggau Pendiau Nuan Dara,
Nangkup Pengerindu Begulai Enggau Nuan..

"Pegi Aku Jauh Ari Nuan."
"Mai Mimpi Enggau Angan"
"Ngambi Aku Badu Bemimpi Ngempu Nuan"

"TELIH ATI NADAI PENAWAR TAU NIPANG"

                              ~Bedarah ulih suman ,Tang Litan enda ulih tenggelam~

Kenang Dalam Ati~ Pengerindu Tua~

Enti baka burung....
Udah lama aku terebai ngagai nuan ambai...
Ngicha ke aku duduk enggau nuan berimbai..

Madah ke penusah ati enggai jauh ari nuan..
Madah ke diri enda ulih idup enti nadai nuan..

Tang mar meh kitai tok mensia..
Semina ulih sebana ba angin lalu ke mansa mua..
Maya ati sinu ngenang chukup merinsa..
Jauh ari pangan emperaja mata..

Tajapan tua jauh...
Beantara ke tasik mayuh penguji..
Nadai mimpi aku nguji...
Deka berubah ati..

Laban semina nuan dalam ati...
Ninting ari aku ngira tunjuk jari..
Ngira ari ke tua kemaya betemu mua..

Enda nemu lejuk ngenang..
Ati meruan enda lantang..
Ngenang diri jauh nuan kumang

Kenang meh aku sulu...
baka aku ditu meruan ngenang nuan siku...

Sada Dalam Ati ~Rindu aku ke nuan~

Rindu aku ke nuan..

Cukup pengelengau ke nuan asi,
Lebuh maya nuan nadai ditisi,
Nadai utai enggau ngelimpang ati,
Majak betati ke nuan emperuji..

Ketegal kereja ngasuh tua belega,
Jarang begulai ketegal pengawa,
Ti baka pengidup ulih ditempa,
Nibuh tua gawa begulai aja,
Ke deka ati ku ambai asi,
Begulai berimbai tua ninting ari..

Berasai panjai ari ku siku,
Jam bejalai begadai tuju,
Tang lebuh maya tua begulai,
Cukup penyampat iya bejalai..

Deras ke silih malam enggau siang,
Awak ke nuan jampat agi ngundang,
Ila nyema nuan dah datai ambai,
Ketu ke ari ngambi enda bejalai,
Ngambi ke tua lama begulai,
Mantup pengerindu ke nuan ambai..

Ba angin lemai ku bekirum pesan,
Madah pengelengau aku ke nuan,
Panas enggau bulan ke ganti aku,
Ngemata ke nuan belama sulu..

Nuan pemeri ke pengambis berega di beri Petara...